ابدئي بنفسك لتغيري ما حولك في مجتمعك

كتبت- نسرين معتوق

في مجتمعنا و كونك أتولدتِ بنت ، ده بيخلق ليكِ تحديات مختلفة ، تحديات بالميلاد و طبعاً بتختلف قوتها بحسب البيت إلي أتولدتِ فيه و كمان الوسط الإجتماعي و التعليمي و الثقافي إلي تُصنف منه أسرتك ، و وصولاً إلي ما إذا كنتِ من سكان المدن أو سكان القرى ، و ما إذا كانت المدينة دي كبيرة و فيها تعددية أجتماعية و طبقية ولا المدينة دي صغيرة .. كل ده بيختار ليكِ نوع التحدي و قوته ، لكن في الآخر بيفضل تحدي .

خلينا نتفق الأول بإننا بننتمي لمجتمع فيه تعددية كبيرة و مقسم طبقياً و فكرياً بطريقة بتخلي الإختلاف بيكون في أوقات كتير صارخ ، يعني زي ما فيه أقصى اليمين فيه أقصى اليسار و فيه كمان الدرجات إلي ما بينهم .

مجتمع مازال إلي حد ما مترابط ( و ده شيء جميل ) و لكن الترابط فيه بينسحب ليتعدى على فكرة الترابط ما بين الأفراد و بعضهم إلي الترابط بالتعدي على حياة الأفراد الأخرين ، و هو ده أقوى أسباب التحدي إلي بيقابلك

فمبدأياً و لأنك بنت ممكن يختار ليكِ مجتمعك ( الصغير أو الكبير ) نوع الرياضة إلي ممكن تمارسيها و إنت طفلة و ممكن أوي يختار نوع التعليم إلي مفروض تتعلميه ( إلي الآن في أنواع دراسة و مهن مرفوضة أو ممكن نقول غير مستحبة للبنات ) .
و بعدين ممكن مثلاً ننتقل للوصاية على طريقة لبسك ، طويل ولا قصير – و ما بين ما يصنف أحتشام و ما يصنف عري قصص عايزة موضوع لوحده و مش هو ده موضوعي دلوقتي – أنا هنا بتكلم عن حقك كإنسانة في الإختيار و مسؤوليتك عن نفسك أولاً و عن إختيارك تانياً.

و طبعاً الصور السابقة دي مجرد أمثلة و لا تعد حصر لأن الصور أشكالها كتير ..

مجتمع لا يوصف غير بأنه ضاغط بس بصراحة هو مش لوحده .. لإن جزء كبير من سلوك الأفراد في أي مجتمع بيبقى أنِعكاس للقانون المطبق فيه ، و بما إن المسؤول النهائي عن كفالة حرية الأفراد هو القانون ، ففي رأيي القوانين المتعلقة بالمرأة بالتحديد أشتركت نوعاً ما في تأخير بعض الحقوق سواء بالصمت عنها أو بعرقلة الوصول إليها .. و هو ده إلي هيأ المناخ المناسب لمُدَّعي الوصاية إنهم يكملوا ما وجدوا أباهم عليه .

عموماً أعظم الإنجازات الإنسانية لا تسجل كإنجازات إلا لما يكون تحقيقها تم في ظروف صعبة .. سواء كانت الإنجازات دي على المستوى الشخصي أو المستوى العملي ، الفرق بس بين الشخص العادي و الشخص إلي تميز هو إن الشخص العادي أستسلم و ما حاوليش يوصل لهدف كان نفسه فيه ، و الشخص إلي تميز فضل يحاول و يقاتل لحد ما وصل و قتاله هو إلي أدى للوصل ليه قيمة .