الحيرة ما بين امرين ومش باين فيهم الصح من الغلط
كتبت-مني خليل
من الحاجات اللي بتوجع أوي في علاقات كتير وخصوصا اللي ملهاش نهاية محددة هي الحيرة ما بين أمرين و مش باين فيهم الصح من الغلط .
خصوصا لو قرار متعلق بشخص أنت فعلا بتحبه أوي ويهمك أمره وعارف كويس أوي أنك فارق معاه .
الحيرة ما بين أقرب ولا أبعد .. مابين أكمل معاه ولا كفاية لحد كدا .. مابين خليني موجود وأهو شايلين هم بعض وفاهمين بعض ومرتاحين لبعض وما بين طب لحد امتى وايه النهاية .
ناس كتير واقعين فيها وتايهين ف نفس الدوامة وبتبقى أصعب وأصعب لو بين الطرفين مسافات طويلة يعني وجع وتعب وكمان مش شايفين بعض .
حيرة ما بين رابط الحب والمشاعر والعشرة وما بين كلام العقل والسؤال اللي بيتكرر ألف مرة من غير أي اجابة مقنعة طب لحد امتى .
وحتي لما عقلك بيهدي ويقتنع ان وجودكم جنب بعض ببيمدكم انتوا الاتنين بالطاقة علشان تواجهوا حاجات كتير بتبقي مصاب بإحباط لكونها علاقة مش مكتملة ومش قادرين تجتمعوا تحت سقف بيت واحد زي اي علاقة حب نجحت .
وكل ما الوقت يمر تزيد الاسئلة والحيرة أكتر .
وتطلع من دوامة لدوامة ومن سؤال معقد لسؤال اصعب .
ومتبقاش عارف انت صعبان عليك الحب ولا العشرة ولا نفسك ولا الوقت اللي بينكم … صعبان عليك الذكريات ولا ماعندكش استعداد تدي فرصه لحد تاني يدخل حياتك ويعرف تفاصيلها …. الموضوع موضوع استعداد ولا حاسس من جواك انه ممكن يكون خيانة .
بس ده كله كوم والوجع الأشد لما تبص للطرف التاني وانت شايفه هو كمان موجوع أوي ومن شدة حبك ليه السؤال صداه بيرج كل حته ف كيانك بقوة ومن غير أي رحمة أو شفقة ياتري أكمل وأفضل جنبه ولا بعدي هيريحه ياتري لو بعدت عنه هيقول عني أيه.
ياترى هيفهمني ولا يظلمني ؟
اتكلم معاه ولا امشي من سكات ياتري وياتري .
معادلة صعبة ومشكلة حلها الوحيد من وجهة نظرى إنك تستحضر وقوفك قدام ربنا وتفكر لما يسألك “كملت غلط ليه ؟”
ليه ما صححتش الوضع ؟
لو لقيت الإجابة اللى ترضيك قدام ربنا كمل وما تبعدش .
لو إتلجمت وعقلك ملقاش إجابة مقنعة ترضى ربنا إبعد.
إبعد وإتمنالهم الخير والتجاوز والتعافى من بعدك.
