كتبت:نسرين معتوق
بحكم شغلي و تعاملي اليومي مع الأطفال ، و لأني تقريباً ما بقابليش و لا بقعد و لا بتكلم أد ما بتكلم معاهم ، فالطبيعي إن ده سمح ليا أني أتابع عن قرب تفاصيل كتير خاصة بيهم ، و شوفت ازاي إن ممكن يبقى في سلوكيات في أسلوب حياتنا بنتعامل معاها ببساطة كبالغين ، و لكن ما نأخذش بالنا إن أحنا بنعيشها لأطفال هتنعكس عليهم و على صحتهم و على نموهم سواء على المدى القصير أو حتى لسنين طويلة ممكن تمتد لسنين عمرهم كله .
السلوك ألي لفت نظري جداً و ألي ممكن أصفه بإنه ظاهرة ، إن في نسبة مش قليلة من الأمهات و الآباء بتتعامل بشيء من عدم الإنتباه أو على الأقل ممكن نقول بإستسلام مع اضطراب ساعات النوم ألي بيحصل عليها طفلهم ، و دي مشكلة أنا شايفاها كبيرة و لو حتى أثرها مش هيببان بشكل واضح على المدى القريب ، بالإضافة إلي عدم أدراكهم بشكل كافي بأهمية حصول الطفل على عدد ساعات نوم متصلة و كافية لسنه ، و الأهم هو توقيت حصوله عليها ، بحيث يكون بليل مش بالنهار خالص .
النوم لا تنتهي وظيفته بكونه الوسيلة ألي بتضمن حصول الجسم على الراحة .. لا .. هو بالإضافة لده هو كمان الفرصة المناسبة ألي من خلالها بتعيد أجهزة الجسم الداخلية ترتيب نفسها علشان ترجع تقوم بدورها و بطريقة سليمة ، بالإضافة إلي أن جودته هي الطريقة المثلى للحفاظ على الصحة العقلية و النفسية و الجسدية على الإطلاق للأطفال و الكبار طبعاً ، و الأكيد إن نقص أو اختلال ساعات النوم ليه ارتباط بإصابة الجسم بأمراض جسدية و نفسية و ممكن تصل لعقلية ، و لا يمكن إنكار أو تجاهل ارتباط أمراض مختلفة مثل الصداع المزمن و السكري و القلب و أضطرابات القولون و غيرها باضطراب ساعات النوم ، بالإضافة لأمراض نفسية و عقلية كتير مثل الإكتئاب و مرض الفصام العقلي و غيره من الأمراض الخطيرة .
– عدد ساعات النوم ألي مفروض يحصل عليها الطفل تحت سن 3 سنوات بيكون ما بين 11 إلي 14 ساعة متصلة .
– و الطفل ما بين سن 3 سنين إلي 5 سنين عدد ساعات نومه مفروض تكون ما بين 10 إلي 13 ساعة .
– و الطفل ما بين 6 إلي 12 سنة عدد ساعات نومه السليمة ما بين 9 إلي 12 ساعة .
– و الطفل ما بين 13 سنة إلي 18 سنة ( المراهقون ) لازم يحصل على عدد ساعات ما بين 8 ساعات إلي 10 ساعات نوم متصل .
حصولنا كلنا سواء كنا بالغين أو أطفال على ساعات نوم كافية و متصلة مش رفاهية أبداً .. دي ضرورة .
و كمان لازم نحافظ على فكرة إن تكون ساعات نومنا جيدة ، و الجودة هنا المقصودة هي الكيف و ليس الكم ، بمعنى مش عدد الساعات بس و لكن كمان إن تكون متصلة و خلال ساعات الليل و هو ده الوقت المناسب و السليم لجسم و عقل سليم.
