كتب د:حازم عبد العزيز
ثقب فى السفينة : فيه مقولة جميلة لديستوفسكى بتقول ” لقد لمحت الثقب في سفينتك منذ الوهلة الأولى ، ولكنى أبحرت معك ظنا منى ان الحب يصنع المعجزات “.
عبارة بليغة معناها ان الانسان ممكن يبقى شايف مشاكل عند انسان تانى بس قرر انه يرتبط بيه ظنا منه ان الحب حيتغلب على المشاكل دى ، ولكن بيفشل . لو طبقنا المقولة دى على إدارة التغيير .. حنتخيل انك شايف ان الفريق المعاون ليك عنده مشاكل. .. انت هنا اللى في مشكلة حقيقية لأنك بتصمم تكمل بالفريق ده وتبنى عليه طموحات وأمانى وانت عندك أمل أن العيوب دى حتختفى مع الوقت وأنه كفاية انك بتحبهم وهما بيحبوك . اوعى تبدأ معاهم مشروعك وانت لسه معالجتش المشاكل دى لأنها لو متحلتش في الأول حتكون معوق كبير وحتبقى ثقب في سفينة نجاحك .
عدم تحملهم للضغوط حيخليهم يتخلوا عنك عند أول اختبار ، خوفهم من تحمل المسئولية حيخليهم ينهاروا عند اول محاسبة عن خطأ ويلبسوا الغلط لغيرهم او ليك انت شخصيا .احتياجهم للمادة حيخليهم يسيبوك في نص الطريق ويروحوا إدارات تانية بتدى فلوس أكتر .. تذكرهم دايما لمديرهم القديم واشتياقهم للعودة إليه مع أنه كان بيعاملهم بقسوة وانت بتعاملهم بحب حيخليهم يحاولوا دايما يرجعوله لأنهم أدمنوا العذاب معاه و اعتادوا عليه .
لو معندكش حلول للمشاكل دى اوعى تطمح في النجاح.. أوعى تعتمد عليهم الا لما تحل مشاكلهم الأول والأهم انهم يكونوا اصلا على استعداد لحل مشاكلهم واللى أغلبها مشاكل نفسية. متقولش نبدأ وربنا يسهلها والميزة فينا اننا بنحب بعض لأن الثقب في السفينة كبير وحيغرقك . الحب عمره ما حينفع لوحده انه يحقق المعجزة ويرمم ثقب السفينة .. لأنه ببساطة زمن المعجزات … قد فات .
