دكتورة زهراء عبد الجواد تكتب : حكاية من القلب
الحب مش كلمة وخلاص دا حكاية كبيرة ملهاش آخر كل واحد بيحسه بطريقته وبأسلوبه الخاص، فيه منا اللى مش مؤمن بالحب وفيه اللي بيشوفه أحلام وردية وفيه اللى بيشوفه وكأنه عايش في جنة، وفيه منا بيشوفه نار وفيه منا بيشوفه جهنم والعياذ بالله.
بس أكيد الحب اللى بنتفق عليه هو حبنا لله عزوجل دا أكيد مفيش فيه اختلاف.
الحب مش بين المرتبطين وبس، الحب واسع وعميق وكمان مش مجرد مشاعر بنقولها ونحسها مع بعض، الحب احترام وتقدير وإنك تلاقى اللى يخاف عليك أكتر من نفسه الى عمره ما يفكر يستغلك ولا يجرحك ولا يفرغ مشاعره معاك بدافع الحب، الحب ممكن يكون حضك أمك، وضحكة أبوك، وخوف ولمة صحابك حواليك.
الحب رزق ممكن ربنا يمنحك قدرة حب حيوان ليك! قطة مثلاً تستناك كل يوم عشان تطعمها، الحب هو كل شيء حلو في حياتنا وكل شيء طاهر مفهوش لا بغيضة ولا استغلال نفوذ أو سلطة.
الحب هو الشئ الجميل في حياتك، الحب بيخلك تنور وبتكون أقوى بتحس انك انسان رحيم ، لما بتحب تلاقى نفسك تعطى أكثر تخاف على حبيبك أكثر بتسامح وبتتحمل، الحب بيخليك انسان جديد، بيغيرك من داخلك، بس الحب مش سهل وطريقه مش بسيط ، والحب لو من طرف واحد بيوجع أقوى، ويخليك تكره كل الناس خاصة لو انت مخلص أووي، فتحب وتيجى تلاقى وجع وألم وجراح واهمال، وحد يبيعك بكل سهولة وانت عملت عشانه كل حاجه، وتكون بالنسبة له ملكش ثمن حتى مشاعرك يستهان بيها، ويبقي هو بالنسبة ليك كل الدنيا وانت ولا أي حاجة مجرد صفقة رخيصة، بس الوجع بيعلمك ويقويك، بيخليك تقدر قيمة نفسك وتهتم بيها وتطورها وتعرف إنك غالى وحبك غالى ومش تديه لاي حد.
بس فيه ناس بتخاف من الحب عشان مش تتوجع بس الخوف دا غلط، عايزة اقولك انك عادى تتوجع وقتها هتتعلم، الحب يستاهل انك تغامر عشان حد يستاهل تفتح قلبك وتديه فرصة يمكن تلاقى الانسان الصادق اللى يغير حياتك كلها، ويبقي العوض اللى انت تنتظره، الحب هو إنك تتقبل اللى بتحبه بكل حاجه عيوبه ومميزاته تقف جمبه في كل الظروف في المرة قبل الحلوة وتكون سند ليها تحس انها مع حد يستاهل الحب دا.
الحب مش مشاعر وكلام، الحب أفعال مش كلام معسول هو إنك تثبت اللى بتحبه إنك بتحبه بجد مش تسهر طول الليل وتقول كلام يدوخ ، لا الحب أفعال مش أقوال وانك تهتم بيه وتسأل عليه وتكون موجود عشانه وفى حياته وقت ما تقول أي تكون واقف تدافع عنها، عمرك ما تصدق عنها حاجة، والحب رزق ولو ربنا كرمك بالحب حافظ عليه وأوعى تفرط فيه ابداً، عشان الحب دا مش بتكرر كتير ولو لسه مالقيتوش أوعى تيأس الحب هيجيلك في الوقت المناسب لما تكون مستعد ليه، الى يحبك هيحبك تكونى مراته وأم عياله هيحبك وهيتوج الحب بشرع ربنا، مش نتعلق ببعض وتقول في الآخر متفقناش.
نصيحة عيش حياتك بحب، حب نفسك أووى، وأوعى تفرط فيها، وحب أهلك وأصحابك، وحب شغلك حتى لو مش مناسب لانك مش عبد لشئ معين ولكن انت عبد لله عز وجل ورزقك بيد الله عز وجل، حب كل حاجة بتعملها مش عشان الناس طاعة لله عز وجل أولاً وحفاظاً على حياتك، الحب هو اللى بيدى لحياتك معنى عيش بالحب عيش بالأمل عيش بطاعة الله عز وجل وفى طاعة الله .
وتذكرى هذه الآية الكريمة: ” وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً” (الروم: 21).
“وَمِنَ النَّاسِ مَن يَتَّخِذُ مِن دُونِ اللَّهِ أَندَادًا يُحِبُّونَهُمْ كَحُبِّ اللَّهِ ۖ وَالَّذِينَ آمَنُوا أَشَدُّ حُبًّا لِّلَّهِ ۗ وَلَوْ يَرَى الَّذِينَ ظَلَمُوا إِذْ يَرَوْنَ الْعَذَابَ أَنَّ الْقُوَّةَ لِلَّهِ جَمِيعًا وَأَنَّ اللَّهَ شَدِيدُ الْعَذَابِ ﴿١٦٥ البقرة﴾”
