لما تفكروا تربطوا حياتكم بشخص لازم يكون حقيقي مش مزيف
كتبت_مني خليل
لما تفكروا تربُطوا حياتكم بشخص لازم يكون حقيقي مش مزيف ، راجل عارف يعني ايه بنات الناس و قيمتهم و يعني ايه وعد ، وان البيوت تتدخل من بابها ، وان القلوب مش لعبة يلعب و يزهق و يرمي ، يكون فاهم كويس انه بيأمن حياة بنت عاشت اكتر من عشرين سنة ف وسط عالم جميل من أم و آب و أخوات مليان دفا و أمان و تفاصيل و ذكريات و هو هيأخد كل ده متمثل فيكي ، لازم يكون عوض جميل و عقلية بتقدَّر و بتحتوي ، لازم يبقى سكن يعني لا يسيب باب الإهمال مفتوح و لا يقفل شباك التقدير في عز ما انتي محتاجه نسمة هوا و كلمة تخفف الحمل و التعب ، لازم يكرمك قولا و فعلاً و مشاعر توازي اللي سبتيه في بيت ابوكى ، ميبقاش بخيل في مشاعره و شايف ان الكلمة الحلوة جِمِيلة منه لكي •
لازم يكون موجود معاكي بقلبهً و بشخصه و بحنانه و بعقليته المحترمة اللي تصلح يكون بيها زوج .. وآب بعدين ، العقلية اللي تخليه مهما انشغلتوا بالعيال و المسؤوليات حاطك في أولوياته و بيراقب منسوب راحتك و سعادتك و عارف انه الوحيد المسؤل عنه ، حواء عموما عاملة زي الماية ان غرِقت فيها تبقى فاشل في العوم و ان فهمت كيميتها هترويك و هتطفي فيك أي حريق مهما كان حجمه ، الخلاصه … إنتوا مبتختاروش شخص إنتوا بتختاروا ملامح عمركم اللي جاي ، بلاش تزودوا البيوت المفلوقة نصين واحد و الأطفال اللي هيعيشوا حياتهم بين الضفتين طفل عشان تلبسوا فستان ساعتين وبعد كده ترجعوا تقولوا يارتنى ما كنت عملت كده ف نفسى .. ” إوعوا متلاقوش اللي تحبوه فتحبوا اللي تلاقوه !” اختاااروا صح