كتبت:داليا زردق
كم من حوارات بيننا خُتمت بجملة ( كله بيعدى)
أيوة طبعا كل شيء بيمر و بيعدى و الحياة بتستمر، بعد موت ، طلاق ، جواز ، ولادة ، خيانة ، بعد و بعد و بعد ،،
ده شيء طبيعي إن الحياة لا تقف علي شيء مهما بلغت عظمته.
لكن السؤال هنا ؟
لما بتعدى و الزمن يمر هل الإنسان بيكون هو هو و لا حاجات كتير بتتغير جواه؟
الطبيعي و العادى إن لازم الإنسان يتغير و لازم نظرته للأمور تتغير، اما حيكون شخص سلبي .
الخبرة بتيجي من التغير ده ،و ده إسمه نضج ، مش اكتئاب زى ما ناس كتير بتردد .
فبعد حدوث أى تجربة في حياة البشر يشعر الإنسان إنه مريض نفسي و حزين و موجوع .
الحزن و الوجع ده هو ضريبة النضج و التعلم ، مفيش خبرة و حكمة بتيجي من الهواء لازم تدفع ثمنها .
لكن الغلط إننا نستمر في دفع الثمن ده العمر كله .
و تضيع حياتنا في غضب علي اللي حصل و رفض للي جري .
و الحياة لا تهتم برفضك أو قبولك.
لأنها مكملة في كل الأحوال.
يبقي من الذكاء إنك تكمل معها و تواكبها، تمشي في خط موازي لها ، صاحبها .
كل ما تتوجع من الأحداث و البشر عيش حزنك بكل طقوسه و عبر عنه اوعي تكبته، لكن قوم بعدها و اتحرك بلاش تعيشه كل حياتك.
عيشه بس الفترة القريبة من الحدث اللي حصل .
لكن الناس بتعيش عمر طويل بس بتتحسر علي عمر فات .
طيب و الحاضر خلاص تجاهلتوه.
لو راح مش حيرجع تاني .
قاوم وجعك مهما كان لا يحتمل ( لا يحمل الله نفسا إلا وسعها)
و افتكر بس أن ربنا اعطي كل إنسان ما يتحمل و ما يستطيع .
و إنك لازم تفوق قبل قطار الحياة ما يمشي و يسيبك تايه في محطة مش محطتك، و تفضل كل حياتك مش عارف توصل.
